Vogliu mughjà, briunà, gridà, stridà, sfurià senza rifiatà chì a tarra corsa ùn hè da vende.
I travagliadori corsi ùn sò micca u macchettu di ricconi impatruniti chì si credenu omniputenti.
Vogliu purtà sustegnu è rispettu à tutti quelli chì ùn volenu esse sottumessi à u reame di u soldu, chì volenu campà libari à modu soiu in casa soia.
À dilla franca, st’indegna malfatta in Luzzipeu hè u risultatu di a crescita di a speculazione è di scelte pulitiche micidiale pà a Corsica (è ben sicura pà a Balagna, ortu di l’isula divintatu « bronze cul » postu chì oghje chì ghjè oghje, l’affari sò in francese).
A Corsica sana, ghjuvellu di u Meditarraniu, hè divintata u puntellu di u tuttu turisimu sfruttatore chì cundanna à morte l’ecunumia pruduttiva isulana, u sviluppu sustenevule di e nostre loche, u campà paru di tutti quelli chì travaglianu.
Sò sclassificate e tarre agricule mentre u prezzu di i tarreni à u metru quadratu ùn face cà cresce multiplichendu e sclusione, e segregazione spaziale è suciale, patute da u populu corsu.
Evviva u sviluppu eunumicu à l’usu capitalistu chì ci spanticheghja !
Sin’à quandu ?
Quale sarà u prossimu ?
Chì novu dannu da cundannà ?
Quantu sfruttatori da cumbatte ?
Quantu militanti da mubilizà ?
Quantu Corsi da discità ?
Sia ciò ch’ella sia, st’indiatura,st’andattura si mantenerà, a mantenetemi.
Ghjè a sola pussibule pà ch’ellu ci sia un dumane.
Anna Laura Cristofari, porta voce di a Manca
