Dumè era sempre dispunibule per aiutà l’altri o i soi,
Dumè era sempre prontu à difende i sfruttati,
Dumè era sempre primurosu ch’elli s’accurdissinu i so fatti à e so parolle,
Dumè ùn si ne ridìa di i valori,
Dumè ùn pudìa pate l’inghjustizie,
Dumè era nemicu dichjaratu di i discorsi astiosi,
À spessu è cun curagiu Dumè facìa ostaculu à tutte e vigliacchezze,
Dumè parlava franc’ è chjaru à quelli chì ci caccianu voglia è speranza,
Dumè era dinò l’amicu di a nubiltà, di a simplicità di a vita,
Ma prima di tuttu, Dumè era un travagliatore, di quelli chì si pesanu à l’alba per andà à stantà si un buccone onestamente, cù dignità.
Dumè ùn era di quelli chì tiranu prufittu, era innamuratu di a so terra, di e so muntagne, un omu chì prezava a ghjente schietta. Un omu di stintu paisanu, un patriottu corsu et un cumbattente di classa.
A so tragica morte inaspettata hè un’inghjustiza inaccettevule per l’omi è e donne chì l’anu tenutu caru, cuntinueremu à onorà a so memoria senza dimenticà l’omu di core, indiatu ch’ellu era.
Cunduglianze à tutti i toi, Desideriu.
