Un annu dop’à l’alizzione di Cameron, prima ministru di u Regnu Unitu vinutu da una dritta oghje più capitalista cà mai chì farìa passà Margaret Thatcher pà una sucialista, guasi 300 000 manifestanti inglesi si sò accolti ghjorni fà inde a capitale Londra da fà sente a so scuntintezza tremenda di pettu à e misure pigliate à la lestra da u guvernu.
A salute, l’educazione, i servizii publichi chì fermanu in attività in Ingliterra sò minacciati pà un pianu d’austerità ecunòmica chì hà cum’è scopu a privatisazione di tutti i settori è a spalanchera di tutte e forme d’ecunumia bramosa di piglià in contu l’intaresi generale è u cullettivu.
Inde un paese pocu avvezzu à ricusà e riforme capitaliste, sta mubilizazione, sta mossa di prima trinca face riflette è ci mostra a strada da suità quand’omu lotta pà a difesa di u campà di e categurie pupulare in risposta à numarosi attachi ideològichi.
