Riaffirmemu l’impegnu puliticu nostru ingrentu à u spaziu di riflissione è d’azzione dettu è cunnisciutu cum’è Cuurdinazione di u 13 d’aprile.
Prima di sviluppà a nostra cuntribuzione, ci tocca à prisintà a visione nostra di u funziunamentu di a Cuurdinazione.
Adunisce oghje associi, sindicati, muvimenti pulitichi è parsone ch’ùn riprisentanu cà elle stesse. Cum’è no l’avemu fatta sin’à avà, si deve mantene a regula di l’accunsentu chì sia scumpartutu da tutti pà aduttà e cumunicazione è l’azzione. Sta manera di cuncippì un funziunamentu cullettivu prova d’esse rispittuosa di l’indipendenza d’ogni urganisazione chì face parte di a Cuurdinazione, di a so natura è di i so ritmi.
A nostra stalca s’arremba nant’à i fundamenti di a lotta de liberazione naziunale inde tutti i duminii (puliticu, suciale o culturale). Ghjè st’andattura ch’ellu ci tocca à seguità chì fatta fine, e dumande pupulare nate da a mubilisazione di u 13 d’aprile è ancu e prime azzione messe in ballu, dimostranu a vulintà in anda di rilancià e lotte cullettive dette di massa.
Un accunsentu chì si possi cunfà incù a maiò parte hè da ricercà s’omu s’arricorda u nostru scopu cumunu : ch’ellu s’impatrunisci u nostru populu di tuttu ciò chì face a suvranità naziunale nostra. Sicondu u nostru parè, esercità di modu cumplettu u drittu à l’autodeterminazione ùn pò accade cà s’omu piglia una certa distanza par raportu à l’istituzione francese. St’autodeterminazione ùn pò vene à cumpiimentu cà s’ella s’appoghja nant’à e nostre capacità cullettive à urganizà ci da par noi (auto urganisazione).
Ogni gruppu riprisentatu inde a Cuurdinazione, ancù puru fendu è purtendu anàlisi critiche, hà accumpagnatu a presa di putere alitturale di a maiurità naziunalista.
Oghje ùn ferma fattiva cà a lotta istituziunale trà e trè faccie di a lotta pulitica messa in opara in Corsica, vale à dì, « lotta armata, lotta di massa, lotta istituziunale ». Ci tocca à ricunnosce chì dopu lasciate da cantu l’andatture d’aspittera, milaie di naziunalisti a si passanu disurientati chì zittu.
U blucchime previdibule di u Statu francese hè tale è quale cà quellu ch’ella cumpate l’istituzione rigiunale impastughjata in a so capacità à decide da u putere culuniale. Aiutendu si di tutti i mezi pussibuli, stu putere prova à fà fiascà a Cualizione Pè a Corsica fendu crede ch’ellu hè incapace u muvimentu naziunale di gestisce l’affari di u paese.
À noi di salvà ci, d’ùn lascià ci piglià da un disanimentu prufondu arrimbatu nant’à un fatalismu mortiferu sempre à favore di u culunialisimu o di i cumbriculi clanisti.
Si devenu rilancià e lotte di massa à prò di e classe pupulare chì patenu u più a duminazione culuniale, culturale è suciale.
U raportu di forza hè da stabbilisce cù u Statu francese è l’inseme di i so partigiani o alliati. Ci deve parmette di cunvince a maiò parte di u muvimentu naziunale chì a pulitica detta d’apartura risicheghja di sbuccà nant’à a spantichera di l’acquisti di a lotta di liberazione naziunale.
Invece di lascià si piglià da u fatalismu smubilizatoghju, hè ora piuttostu d’apprufundisce a lotta fendu la più attuale è participatoghja cù e donne, i travagliadori è a ghjuventù, vale à dì i più culpiti da un sistema economicu micidiale.
Pà nutrisce a nostra dimarchja, ci pudemu appoghje nant’à e tematiche storiche di a lotta di liberazione naziunale, chì toccanu sopra tuttu à e quistione suciale. E nove prublematiche di u XXIesimu seculu, in leia cù a spantichera di l’equilibrii eculogichi devenu primurà ci oghje più cà mai.
A storia di i raporti di forza trà a nostra nazione è u Statu francese ci cunduce à esse scantati da u nostru ambiu naturale è culturale, vale à dì a conca meditarrania, st’inseme pluriseculare chì ci cuntene. Sta conca hè culpita da putenze neo culuniale (Francia, Spagna è Italia) è pate saccheghji da putenze imperialiste (Stati Uniti, Russia, China).
E nostre prime azzione internaziunale devenu esse in giru à a ricerca di nove leie fattive, al dillà di e leia storica da fà rinvivisce, trà i tarritorii di l’inseme meditarraniu. À parte si di un primu spirimentu incù un muvimentu independentistu sardu, emu postu e base di un’Assemblea di i populi di u Meditarraniu. Vi prupunemu di rilancià st’idea, chì in li so tempi, avia cunnisciutu un certu successu, sopra tuttu pà ciò chì tocca à a smilitarisazione di i zone accupate da e putenze culuniale è imperialiste.
Sò parechji i sughjetti degni da a nostra primura. A quistione suciale, à spessu messa da cantu o piazzata di modu sprupusitatu in cuncurrenza cù a quistione eculogica o culturale, ùn si pò gestisce cà à longu andà, offrendu li u fondu ideologicu ch’ella mireta.
A pricarità è i strazii ùn sò u risultatu di una gattiva sorte ne mancu u fruttu di circustanze casuale. L’ideulogia preduminente, cuncrettizatà cù l’alizzione à a prisidenza di Macron, ùn da capu à l’equilibrii suciali o ambientali.
Tutte e prova fatte da accuncià stu sistema anu fiascatu. Ci ferma dunque à definisce ciò chì pudarianu esse i cuntorni di un’ alternativa rispittuosa à tempu di e parsone, di i gruppi è di l’urganisazione cullettive.
Cunvinti chì no semu da e suluzione pulitiche ch’ella ci pò purtà a Cuurdinazione, invitemu tutti i participenti à st’andattura à cuntinuà è à apprufundisce a nostra dimarchja cumuna. »
Fratellanza.
A Manca.
