Basta a spantichera di l’educazione in Corsica !

A Manca sustene a greva di l’insignanti di stu marti 31 di ghjinnaghju è di modu generale, l’andattura ch’ellu vole da u STC educazione à stu muvimentu di còllara inde u mondu di l’educazione.

I ghjovani corsi sò in traccia di pagà a pulitica di spantichera di u sirviziu publicu messa in ballu da a dritta dipoi anni è anni è rinfurzata da N.Sarkozy. Smariscenu posti è posti (347 dipoi u 2004 è 53 l’annu chì vene inde noi) ancu inde e squadre bislingue cum’è inde a scola elementaria di Luri, cresce oghje più cà mai u numaru di i sculari inde e scole, mancanu i prufessori da rimpiazzà i culleghi malati. Più va più si guastanu e cundizione d’amparera offerte à i zitelli cum’è e cundizione di travagliu di i parsunali educativi.

U guvernu cerca à fà ci crede chì a culpa hè di a crisa ecunòmica mundiale : ci tuccarìa à sacrificà l’avvene di a nostra ghjuventù accitendu di vede trafalà i mezi di l’educazione.

Oghje più cà mai, i ghjovani abbisognanu una furmazione custruita, di qualità, chì sia capace di fà rinculà a crescita tremenda di e sparità inde a nostra sucetà. Ùn c’hè cà a scola publica chì possi mantene a parità trà i sculari è u gustu d’ampara senza rèditu.

A Manca dinuncia  a muta piriculosa patuta da u mondu di l’educazione chì pocu à pocu diventa un’intrapresa guvernata da una lògica di fruttabilità.

Pà finisce, a Manca, sulidaria di sta lotta, hè pronta à participà di modu fattivu à tutt’azzione di sustegnu.