À u ghjovanu Ghjuvan Marcu Santelli, dui insignanti di u so liceu di Fiumorbu l’anu rimpruvaratu d’avè rispostu à a chjama in iscola in lingua corsa.
Stu fattu più cà naturale in bocca à un zitellu corsu ingrandatu in una filiera bislingua l’hà fattu purtà davant’à u capu di stabbilimentu pà ghjustificà si cum’è s’ellu era un banditu culpevule d’avè abbuttatu una casa. Ghjè stu puntu precisu ch’ellu ùn si pò accittà è chì noi, militanti di a Manca, cundannemu cun forza.
Sta dramatisazione di l’usu di u corsu pà un insignanti in 2018 pare incredibile s’omu pensa à u travagliu cumpiitu da decine è decine di prufessori inde e filiere bislingue di l’isula.
L’infrasata « si tout le monde se mettait à parler sa langue, on ne s’en sortirait plus » mostra chì a parsona chì hà prununciatu ste parolle ùn capisce -o ùn vole capisce- a piazza di a lingua corsa in casa soia. Forse sarà parchì a lingua corsa ùn l’accupa ancu sta leghjittima piazza oghje chì ghjè oghje…
Dop’à quarant’anni di Riacquistu è di battaglia pà u bislinguisimu in difesa è prumuzione di a lingua corsa, certi avvenimenti ci parenu sunniacci chì ci ramentanu i tempi di a CFR o di Francia quandì u campà, u cantà o u parlà corsu, a semplice rivindicazione linguistica era guasi un attu tarruristu.
Per noi, militanti di u drittu à l’autodeterminazione è di i dritti storichi di u populu corsu, sta situazione ùn saria stata pussibule s’ellu c’era per tutti quelli chi campanu in Corsica l’obligu di ammaestrà a lingua corsa, intesa tandu cum’è cuufficiale, à paru inde tutti i duminii à u francese.
A Manca
