Emu aspittatu una stundarella pà scrive un resu contu chjaru è ugettivu di l’azione iniziata marcuri passatu in Calvi da u Cullettivu contr’à a spiculazione è pà u drittu d’allughjassi.
Inde un tempu mediàticu accupatu sopra tuttu è di modu più cà leghjìttimu da l’azione di u STC contra l’ARS, emu riesciutu à mubilizà ,un ghjornu di sittimana in Balagna, più di 80 parsone vinute da rete suciale, assuciative o citatine sfarente.
Ci pare in piena sparghjera u nostru « a spiculazione basta, demu ci una manu pà impone un’alternativa ! » ancu s’ellu si pò sente sempre u « chì fà, chì ci si pò fà » di certi travagliadori calvesi assuffucati da una pulitica capitalista fatta da una minurità ma dinò da u clanisimu è da u sumerisimu di i so eletti.
Di pettu à u disprezzu tremendu è à u silenziu culpèvule di a merria cum’è di a CAD chì spera chì noi ci semu adrumintati, emu sceltu inde u Cullettivu a strada di l’azione determinata è di u dibatittu publicu. Emu ricusatu di modu assulutu u prugettu puliticu di a merria Santini d’accunsentu cù i sfruttatori di a CAD, prugettu fundatu à nant’à un tuttu turisimu chì arruina l’impiegu, l’accessu à l’alloghju, l’ambiente è i spazii naturali cullettivi .
Emu chjamatu i participanti à sprimà si nant’à ciò ch’elli volenu fà di stu tarrenu soiu dettu di l’Oasis ; emu parlatu di parechje suluzione da sviluppà cum’è u fattu di ripiantà l’arburi o cum’è quella di a custruzzione d’infrastrutture ghjuvattive à livellu suciale (ALSH o centru culturale).
Ghjorni fà in Calvi, s’hè scritta a prima pagina di un altru avvene…
Cuntinuemu à mubilizà ci è a prupone un’altra strada !
Anna Laura Cristofari (A Manca), membru di u Cullettivu
