Oghje in Corsica pare ch’ella sia a cultura sìmule à un attrazzu ch’ùn hè magaru più ghjuvèvule in se stessu.
Vale à dì ch’omu chjama cultura tutti ciò chì pò serve à dà un valore aghjustattu à u tuttu turisimu corsu chì ammaistra l’ecunumìa di issu paese.
A cultura hè divintata un produttu cume altre tanti ; sarà forse menu gustosa cà u salciciu o u figatellu, innò ?
Allora, chì si passa ?
Ciò ch’avaranu persu u stintu puèticu i scrittori isulani ? Questa afirmazione ùn hè verità s’omu si primureghja di suità u travagliu tremendu sviluppatu dipoi anni è anni da scrittori fini cume par esempiu Marcu Biancarelli, Ghjilormu Ferrari o Rinatu Coti, ognunu ben intesu secondu à so manera.
Purtantu ùn si pò dì ch’omu ùn lotta in lu spaziu publicu pà a salvezza di a lingua : ch’ellu sia in iscola, inde e famiglie o ancu in carrughju, prova a ghjente cù i so dèbuli mezi è sopra tuttu a ghjuventu à aduprà a lingua corsa, fusse strupiendu la a li spessu. E da issu puntu di vista, hè stimulata da guasgi tutti l’attori di a vita citadina lucale, di manca o ancu di dritta postu ch’ellu hè divintatu « un créneau porteur » l’affare di a difesa di a lingua nustrale ( s’omu ùn face casu di i vechji lumacconi sempre vivi à fiancu à noi, chì fermanu periculosi adoratori di a lingua francesa eterna è unica lingua di altu livellu inde a ripublica francesa….). E vi dighjaraghju chì megliu farianu tutti issi corsi indiati à fà cresce i so sforzi !
Sarìa chì parechji corsi hanu aduprattu una visione sfarente di ciò ch’ella hè a cultura ? Una cultura pupulare chì si sparghje è campa in libartà, senza u rinforzu di u soldu è bellu piuttostu cù a lògica di fà di gràtisi ùn avarìa forse più a so legghjittimità in una tarra induve pocu à pocu si principia à vende tuttu ?
