In stu 16 d’Aostu, in Carghjese, mentre s’appruntava un cuncertu di i Muvrini, parullaccie d’odiu sò state scritte nant’à l’affissi è i muri di u paese contr’à i musicanti è u so cuncertu.
S’omu pensa chì trenta cinqu’anni fà, a CFR circava d’impedisce certi cuncerti ghjudicati piriculosamente naziunalisti, c’hè da ride ! Chì ghjè chì scumoda sta ghjente ? I Muvrini ùn sarianu micca abbastanza corsi è a so musica, cunsidarata da elli, cum’è troppu « world music » ùn saria abbastanza identitaria. Dunque, certi ghjudici è cinsori di l’usi è i valori, novi integristi di a cursità, avarianu a printinzione di struisce u populu è a ghjuventù ?
Vulemu manifestà u nostru sustegnu à u gruppu i Muvrini. Una lingua, una cultura ùn pò cresce cà campendu inde a diversità. Un populu maturu in capacità d’affirmà a so esistenza è i so dritti ùn hà bisognu d’esse supraniatu da muderni inquisitori, gardiani di a purezza di l’antenati.
A MANCA
