Mentre chì inde a sucetà corsa si mischianu di più in più u mondu puliticu di a piccula burghesia è quellu di a mafia è di e rete decisi à impatrunisce si di e nostre risorse (ùn c’hè cà à vede u numaru di i crimini detti di sangue in Corsica, oghje più numarosi cà in Sicilia !), u Statu francese è l’istituzione corse chì u servenu provanu à criminalizà l’azione militante è sopra tuttu sindicale postu ch’ella riprisenta l’ultima sperenza di pettu à sta scunfitta generale è ancu ch’ellu ghjè inde u mondu di u travagliu ch’ellu si fissa di modu chjaru u raportu di forza puliticu.
Inde i circuli di u putere ecunòmicu è mediàticu, si piglia oghje un’andattura pessima chì disprezza l’impegnu militante cù l’argumintazione « chì fà chì ci si pò fà, hè a lege di u marcatu è i pulitichi ùn ci la facenu più ! » è si primureghja di fà cresce i pruffitti senza nisun cuntrollu puliticu in nome di a libara intrapresa capitalista ben sigura. Più va, più cercanu à fà ci pinsà chì l’omi pulitichi ùn anu più alcuna leghjittimità à ammaestrà l’urganizazione ecunòmica di a sucetà.
À listessu tempu, i partitti pulitichi ancu minuritarii, ancu forza d’uppusizione, anu rinunciatu à a crìtica, ùn cercanu più à fà valè un prugettu di sucetà chjaramentu definitu, appughjèndu si nant’à a militanti indiati inde stu travagliu ma volenu l’adesione di una banda di fans in busca di fama à qualcu livellu ch’ella sia. Vale à dì ch’ella si sparghje cusì a depulitizazione di stu paese. Stu livellu debbule di cuscenza pulitica, s’omu li aghjusta a poca primura data à l’educazione è a furmazione di a ghjuventù, cagiona u rinforzu di tutte e forme di clanisimu è u rinculu di una dimucrazia fatta da u populu pà u populu.
Oghje più cà mai, dimucrazia da fà !
