U marti 27 d’uttobre, vale à dì qualchi sittimane prim’à l’alizzione tarrituriale di dicembre, 179 senatori di dritta è 2 PRG anu ricusatu a ratìfica di a Cartula di e lingue aurupee minuritarie. Figurate vi chì sta cartula chì Hollande avìa prumessu di firmà in 2012 ùn hè manc’appena a generalisazione di un bislinguisimu obligatoriu in Corsica. Ma ancu quand’ellu s’agisce di purtà rivindicazione dimucratiche a minima, cù un spìritu, un’andattura d’apartura, a risposta di u Statu francese, in a so logica culuniale, ferma sempre a listessa : innò !
Ghjè un affrontu tremendu pà quelli, partiti pulitichi o citatini, chì credenu di strappà avanzate istituziunale in nome di a riprisentatività nova di l’idee naziunale in Corsica, in nome di i soli successi alitturali, di a sola ghjustificazione alitturale di u muvimentu naziunali.
L’urganisazione pulitiche chì facenu parte di u muvimentu naziunale cum’è i citatini chì si dicenu patriotti, s’avvedenu forse oghje chì ghjè oghje chì e dumande istituziunale ùn bastanu è sò ricusate s’omu ùn urganizeghja micca un raportu di forza bellu più glubale. I dritti storichi di u populu corsu, è sopra tuttu u drittu à l’autodeterminazione, ùn pudaranu di sicuru esse strappati cà par via di mosse pupulare è di lotte multiplicate nant’à u tarrenu suciale.
Hè par quessa chì, à contu nostru, chjamemu à urganizà stu raportu di forza anticulunialistu è prugressistu pà avanzà, chjamemu à resiste.
A Manca
