Oghje chì ghjè oghje, mentre ch’ellu s’affaca un veranu rivuluziunariu è dimucràticu, colmu di tutte e prumesse in lu mondu àrabu- musulmanu, emu pruvatu, noi militanti di a Manca, à fà rinvivì u nostru situ chì era à pinuccia anticu da dà li un’ andattura più muderna.
Sti populi di u Maghreb è di u Vicinu Uriente, vittìme di sfruttatori burghesi chì si sò impatruniti di e so ricchezze in rilazione stretta cù e mafie ch’elle sianu lucale o strangere, anu riesciutu quantunque à spanticà i fundamenti di Stati tutalitarii è currotti aduprendu e tecnulugie e più muderne da sustene a so azione. I populi bramosi d’ammaestrà u so destinu anu pigliatu u cuntrollu di tutti i spazii virtuali o cuncretti
i.
Noi quì in Corsica, vittìme chì no’ semu di u clanisimu, di a privatizazione di e nostre ricchezze naturale da a Mafia, ci si pare d’esse furtunati postu ch’elli ci fermanu uni pochi di spazii di libara sprissione pà denuncià li. Ma attenti ! A dimucrazia s’ampara pianu pianu è u pocu chì hè statu custruitu si pò ancu strughje prestu prestu. Tocca à noi à ghjuvà ci di tutti i mezi pulitichi da allarghà u dibatittu publicu è da fà rinculà a sparghjera di l’intaresi mafiosi in Corsica.
